Яңалыклар

Актаныш гимназиясе Шекспирның моңа кадәр татарча куелмаган әсәрләрен сәхнәләштерде

Актаныш сәләтле балалар өчен гуманитар гимназия-интернат иҗат төркеме куелышында Шекспирның «Макбеты», «Ричард II» һәм «Юлий Цезаре» беренче тапкыр татарча адаптациягә ия булдылар. 6 февраль көнне укучылар һәм укытучылар Уильям Шекспирның тарихи пьесалары нигезендә театраль эскиз куйды, дип хәбәр итә гимназия.

«Хакимнәр турында хикәятләр» дип аталган куелышка «Ричард II», «Ричард III», «Макбет» һәм «Юлий Цезарь» пьесаларыннан өзекләр керде. Эскизның режиссеры — гимназия-интернат тәрбиячесе һәм укытучысы Ленар Хөсәенов.

Узган елның декабрендә Шекспирның «Цимбелин»ы шулай ук беренче тапкыр Казанда татарча куелган иде. Ул проектны Казан театраль училищесының чыгарылыш студентлары диплом эше буларак башкарып чыкты.

«Спектакль — Шекспирның үз сүзләренә җанлы иллюстрация: „Фани чигәләрне кыскан буш таҗның эчендә әҗәл үзе урда корган: утырадыр шунда бер шамакай…“. Хаким булуның татлылыгы хакына үз гомерләрен һәм башкаларның язмышларын харап иткән тарихи шәхесләр бу эскиз-спектакль аша безгә сорау бирәләр сыман: „Ә мәгънәсе?“» — диелә гимназия хәбәрендә.

https://tatar-inform.tatar/news/culture/07-02-2020/aktanysh-gimnaziyase-shekspirny-mo-a-kad-r-tatarcha-kuelmagan-s-rl-ren-s-hn-l-shterde-5721362
Вакыйга
Made on
Tilda